ՀՅԴ նախաձեռնությամբ ընդդեմ հայ-թուրքական արձանագրությունների վավերացման շուրջ համախմբված 14 կուսակցությունները դեկտեմբերի 1-ին «Էրեբունի» բիզնես կենտրոնում հայտարարություն են տարածել՝ վերահաստատելով իրենց պայքարի վճռականությունը։ Հայտարարությունում մասնավորապես արձանագրված է, որ ստեղծված իրավիճակում դեռևս ուշ չէ անհապաղ քայլեր ձեռնարկելու միջոցով շտկել իրադարձությունների զարգացման վտանգավոր ընթացքը։ Մասնավորապես նշվում է, որ Սահմանադրական դատարանը, նկատի ունենալով առնվազն այն, որ արձանագրությունները հակասում են Հայաստանի անկախության հռչակագրով և ՀՀ Սահմանադրությամբ հայոց պետականության հիմնարար սկզբունքներին ու համազգային նպատակներին, և խախտվել է ՀՀ Սահմանադրության 83.5 հոդվածի 9-րդ կետով և միջազգային պայմանագրերի մասին ՀՀ օրենքով սահմանված պայմանագրերի կնքման կարգն ու պայմանները, պարտավոր է այդ արձանագրություններով ՀՀ կողմից ստանձնվող պարտավորությունները ճանաչել ՀՀ Սահմանադրությանը հակասող, իսկ ՀՀ նախագահի կողմից հիշյալ արձանագրությունները Ազգային ժողով ուղարկելու դեպքում խորհրդարանը չպետք է այդ բովանդակությամբ վավերացնի դրանք։ Հայտարարության վերջում ՀՀ բոլոր քաղաքացիներին և համայն հայությանը կոչ է արվում միանալ հայ-թուրքական արձանագրությունների վավերացման դեմ ուղղված ստորագրահավաքին և իրենց հետագա գործողություններին։

7or.am