Ռազմական հոգեբան, ՊՆ արտաքին կապերի հասարակական խորհրդի անդամ Դավիթ Ջամալյանը, խոսելով մինչզորակոչային տարիրքի երիտասարդների ֆիզիկական ու հոգեբանական պատրաստվածության անհրաժեշտության մասին, այսօր լրագրողներին ասել է, որ բանակում մարտունակ և հոգեպես հավասարակշռված զինծառայող ունենալու համար անհրաժեշտ է, որ զինվորը հոգեբանորեն պատրաստված լինի դրան։

-Նախապատրաստելու գործը հիմնականում երկու ոլորտ է իրականացնում՝ մեկը դպրոցն է, մյուսը ընտանիքը։ Թե ինչքանով է դպրոցը կարողանում այս հարցը կարգավորել, դա այլ քննարկման խնդիր է,-ասել է հոգեբանը՝ նշելով, որ մեր օրերում երբեմն ընտանիքն էլ է թերանում այդ գործում։

Նա նաև հավելել է, որ եթե նորակոչիկը զինվորական կյանքին չի հարմարվում, ապա զինվորական ծառայությունից ազատվելու համար տարբեր քայլերի է դիմում՝ սիմուլյացիա, ինքնախեղում, ինչը, իհարկե, անչափ ցավալի է։

-Սակայն եթե նախապատրաստված գնա բանակ, ադապտացիայի շրջանը շատ ավելի հեշտությամբ կանցնի,-ասել է բանախոսը՝ նշելով, որ բանակի միջավայրին ավելի հեշտ են հարմարվում այն երիտասարդները, որոնց ընտանիքները դեռ վաղ դպրոցական տարիքից իրենց զավակին ներշնչել են այդ երևույթի անխուսափելիության գաղափարը, և հետագայում նրանք չունեն այնպիսի հույս, թե իրենց ինչ-ինչ ճանապարհով կարող են ազատել զինվորական ծառայությունից։

Էլ ավելի շուտ են հարմարվում այն նորակոչիկները, ովքեր ֆիզիկական պատրաստվածության ինչ-որ փուլ են անցել։ Այդ գործում, ըստ բանախոսի, մեծ դեր է խաղացել ՀՀ քիքբոքսինգի ֆեդերացիան, որտեղ, բացի մարտական արվեստից, երիտասարդները ստանում են ռազմական տարբեր գիտելիքներ, ինչն էլ նրանց նախապատրաստում է բանակային կյանքին։