Երբ ամեն անգամ տոնական առիթով իշխանավորներն վերից վար սկսում են շնորհավորական ուղերձներ տարածել, մտածում ես՝ այդ տեքստերը բացի դրանք գրողներից ու «շարողներից» ոչ ոք չի կարդում:

Մարդկանց այդ՝ «քնքշանքով ու ջերմությամբ լցոնած» շարադրանքները պետք չեն: Երբ, մանավանդ, ապրում ենք այնպիսի մի գաղջ ու ապականված իրականության մեջ, որի թիվ մեկ պատասխանատուն նույն այդ իշխանավորներն են՝ վերից վար:

Բայց մի զավեշտական բան նկատեցի, մասնավորապես, Սերժ Սարգսյանի ուղերձում: Պարզվում է, նա «ավանդույթ» է դարձրել դեկտեմբերի 6-ի կեղծված հանրաքվեից հետո ամեն տոնական առիթով իր ուղերձներում շեշտել սահմանադրական «բարեփոխումների» գործընթացի մասին ու երդվելու պես անպայման խոստանալ, որ հեսա-հեսա կտեսնեք, թե էդ «բարեփոխումների» շնորհիվ ինչքան լավ եք ապրելու դուք:

Մարտի 8-ի առիթով էլ նրա անունից տարածված ուղերձում նույն՝ սահմանադրական «բարեփոխումների» մասին հատուկ շեշտադրում կա:

«Այժմ մեր երկրում կանայք շատ ավելի մեծ դեր ունեն, քան ունեցել են երբևէ»,- գրված է Սերժ Սարգսյանի ուղերձում ու դարձյալ նշված, որ հեսա-հեսա «բարեփոխումների» շնորհիվ ավելի կբարձրանա կանանց դերը:

Սահմանադրական «բարեփոխումները» դնենք մի կողմ ու հարցնենք՝ այդ որքա՞ն մեծ է մեր երկրում կանանց դերակատարությունը, որը մինչեւ հիմա չէինք տեսել:

Փաստորեն, շատ աննախադեպ բան է տեղի ունեցել եւ դրա համար կանայք «պարտական» են իր նախագահության շրջանին: Եթե ՀՀԿ-ական «կանանց գունդը» անմոռուկներով «զարդարված» Ծիծեռնակաբերդում ծիծաղում ու զվարճանում է, հավանաբար, դա պետք է դիտարկել բոլոր կանանց արտոնված «ավելի մեծ դեր»-ի շրջանակներում: Կամ՝ երեւի, ՀՀ իգական սեռի գերակշիռ մասը ՀՀԿ-ական վերնախավի կանանց նման բիզնես-վումն է:

Իրականում, հայ կանանց մի զգալի հատված դեգերում է օտար ափերում եւ որ՝ ամենանվաստացուցիչն է՝ առեւտուր է անում Թուրքիայում, թուրքերի առաջ սպասյակություն ու դայակություն է անում, որպեսզի կարողանա այստեղ ապրող իր ընտանիքին պահել: Այսպես, պարզվում է «ավելի մեծ դեր» ունեն նրանք:

Էլ չենք խոսում սահմանագոտում չարքաշ գոյությունը քարշ տվող կանանց մասին, որոնք զրկված են ամենատարրական պայմաններից եւ կենսապահովման օբյեկտներից:

Եթե երկրում գործազրկության ծավալներն այսքան մեծ են, ինչպե՞ս կարող է կանանց դերը մեծ լինել:

Երևի խորհրդարանի ամբիոնից քծնական բնույթի բոցաշունչ ելույթներ ունեցող ՀՀԿ-ական կանանց տեսնելով ու լսելով՝ Սերժ Սարգսյանը որոշել է, որ իր նախագահության շրջանում կանանց դերակատարությունն ավելի է մեծացել:

Կիմա Եղիազարյան