«Հայելի» ակումբում հրավիրված ասուլիս-բանավեճի ընթացքում Հանրապետական կուսասկցության ներկայացուցիչ Կարեն Ավագյանը, գնահատական տալով ՀՀԿ 12-րդ համագումարին, ասել է, թե այն աննախադեպ էր։ «Նման կուսակցական հավաք ես չեմ հիշում, որ եղած լիներ։ Համագումարում հնչեցին այն բոլոր հարցերը որոնք հուզում են հասարակությանը, և կարևորը այն էր, որ դրանք հնչեցին հենց նախագահ Սերժ Սարգսյանի շուրթերից»,-նշել է Կ. Ավագյանը։ Անդրադառնալով վերջերս վարչապետի, նախարարների ՀՀԿ-ին անդամագրվելու փաստին՝ նա ասել է, որ  այդտեղ որևէ արտառոց բան չկա՝ «ընդամենը անդամագրվել են նրանք ովքեր ցանկանում էին անդամագրվել»։

ԱԺ «Ժառանգություն» խմբակցության ղեկավար Ստեփան Սաֆարյանն էլ նշել է, որ անձամբ իր համար ՀՀԿ համագումարը ցույց տվեց, թե ինչպիսի մոդել է նախապատրաստում Հանրապետականը առաջիկա ընտրությունների համար։ «Այս համագումարով նաև նկատվեց, որ Սերժ Սարգսյանը նախապատվություն տալիս է մեկ դերակատարում ունեցող խավին։ Ռոբերտ Քոչարյանի օրոք այլ էր։ Նա սիրում էր խաղալ մի քանի դերակատարներով»,-ասել է Ս. Սաֆարյանը։