Ինչպես ավելի վաղ գրել էինք, այսօր՝ ժամը 11.00–ին, «Նաիրիտ» գործարանի նախկին աշխատակիցները հավաքվել էին Ազգային ժողովի մոտ՝ «Նաիրիտի» հարցերով զբաղվող հանձնաժողովին հիշեցնելու, թե ինչ նպատակով է այն ստեղծվել առհասարակ։

Լրագրողների հետ զրույցում նաիրիտցիները նշել են, որ գործարանի հարցերով ենթահանձնաժողովն անգործության է մատնվել և գործարանի վերագործարկման ուղղությամբ որևէ քայլ չի ձեռնարկում։

Հիշեցնենք՝ ավելի վաղ էներգետիկայի և բնական պաշարների նախարար Երվանդ Զախարյանը հայտարարել էր, որ կառավարությունը շահագրգռված է գործարանի վերագործարկմամբ, սակայն, միևնույն ժամանակ, նշել էր, որ դեռևս ոչ մի կազմակերպություն հետաքրքրված չէ «Նաիրիտով»։

ԱԺ–ի մոտից ցուցարարները երթով շարժվել են դեպի ՀՀ կառավարություն։

«Vesti.am»-ի հետ զրույցում «Նաիրիտի» գույքագրման խմբի գլխավոր մասնագետ Արմեն Դեմիրճյանն ասել է, որ աշխատակիցները հանդիպել են էնեերգետիկայի փոխնախարար Լևոն Շահվերդյանին:

-Փոխնախարարն ասաց, որ ռուսական կողմից «Նաիրիտի» հանդեպ հետաքրքրություն ու շահագրգռվածություն ցուցաբերած ներդրողներ են հայտնվել: Գործարանում մեր ներկայացրած ծրագրի հիման վրա գույքագրում է իրականացվում, փաստաթղթեր են ստուգվում: Ես լավատես եմ ու հույս ունեմ, որ «Նաիրիտը» վերագործարկման ուղու վրա է,-ասել է նա:

Դեմիրճյանը նշել է, որ էներգետիկայի փոխնախարարի խոսքով՝ գործարանում նոր սարքավորումներ էլ կավելացվեն, քանի որ հներն ավելի ծախսատար են:

«Նաիրիտի» գլխավոր մասնագետը հավելել է, որ եթե ամեն ինչ իրենց ծրագրերի համաձայն ընթանա, 2017-ի սկզբին կարելի կլինի խոսել գործարանի վերագործարկման մասին:

Նաիրիտցիները որոշել են Ազգային ժողովի մոտ կրկին հավաքվել փետրվարի 25–ին։

7or.am