Հարցազրույց

02.03.2012 16:04


Արարատ Զուրաբյան

Արարատ Զուրաբյան

Այսօր կայացած «Ժառանգություն» կուսակցության 7–րդ համագումարի ժամանակ «Ազատ դեմոկրատներ» կուսակցության անդամ Արարատ Զուրաբյանը պատասխանել է լրագրողների հարցերին

–«Ժառանգությունն» ու «Ազատ դեմոկրատները», ի վերջո, ե՞րբ են հայտարարելու համագործակցության մասին։

–Համագործակցությունը կարելի է արձանագրել, որ առկա է, և հավանաբար շատ շուտով նաև բոլորը կտեղեկանան, որ ձևավորվելու է մի նոր դաշինք «Ազատ դեմոկրատների» և «Ժառանգության» միջև, իսկ մնացածը զուտ տեխնիկական հատվածն է։

–Իսկ այդ դաշինքի համամասնական ցուցակը Րաֆֆի Հովհաննիսյա՞նը, թե՞ Խաչատուր Քոքոբելյանն է գլխավորելու։

–Նախ և առաջ պետք է արձանագրումը լինի այն փաստի, որ այդ դաշինքը գործելու է, իսկ ֆորմալ արձանագրումը կլինի հետո՝ թե ո՞վ է լինելու, ի՞նչ համամասնությամբ, առաջինը, երկրորդը, երրորդը։ Դաշինք կլինի՛, համոզված եմ դրանում, իսկ թե ո՞վ կլինի առաջինը կամ երկրորդը, հավատացած եղեք՝ մեզանից որևէ մեկը այդ քննարկումը չի անցկացրել։ Կարծում եմ, որ առաջիկա օրերին այդ քննարկումը կլինի, և որևէ մեկը գաղտնիք չի պատրաստվում դա պահել։ Համամասնական ցուցակի կազմի մասին ընդհանրապես որևէ քննարկում տեղի չի ունեցել։

–Խորհրդարանում պատկերացնո՞ւմ եք համագործակցությունը, օրինակ, ՀԱԿ–ի կամ ԲՀԿ–ի հետ։

–Մենք բոլորի հետ պատկերացնում ենք համագործակցությունը այն հարցերի շրջանակներում, որտեղ կունենանք միասնական մոտեցում, անկախ նրանից՝ դա ՀՅԴ–ն է, ՀԱԿ–ը, թե մեկ այլ կուսակցություն։ Այդ համագործակցության սաղմերն արդեն իսկ կան. հարյուր տոկոս համամասնական ընտրական համակարգի վերաբերյալ մեր մոտեցումները նույնն էին, և ես կարծում եմ, որ կլինեն նաև բազմաթիվ այլ հարցեր, որոնց շուրջ համագործակցությունը կլինի։

–Իսկ ինչո՞ւ որոշեցիք երկու կուսակցությունների դաշինքով գնալ, այլ ոչ թե Ձեր կուսակցություններից որևէ մեկի համամասնական ցուցակում միավորվել։

–Որովհետև մենք երկու տարբեր քաղաքական ուժեր ենք։ ՀՀ օրենքը որոշակի սողանք է թողել՝ քաղաքական ուժը կարող է լուծվել մյուսի մեջ և մասնակցել ընտրություններին, բայց մենք չենք ցանկանում նման սողանքից օգտվել։ Մենք համոզված ենք, որ հեշտությամբ կհաղթահարենք դաշինքին անհրաժեշտ յոթ տոկոսը։ Կարծում եմ, որ սա միակ ու լավագույն ձևն է, որովհետև, ի վերջո, եթե մենք ամբողջությամբ ընդհանրություն ունենայինք ամեն ինչում, մենք տարբեր քաղաքական ուժեր չէինք լինի, այլ կմիավորվեինք մեկ քաղաքական ուժի մեջ։ Միգուցե ժամանակի ընթացքում նման հնարավորություններ լինեն։

–Այլ կուսակցություններ լինելո՞ւ են այդ դաշինքում։

–Այդ և բոլոր տիպի հարցերը քննարկվելու են հետևյալ հարցի վերջնական լուծումից հետո։ Պաշտոնապես երբ կհայտարարվի դաշինքի մասին, համապատասխան խմբեր մեզանից և «Ժառանգությունից» կնստեն և մնացած բոլոր հարցերը կքննարկեն։ Ցուցակը կլինի շատ մոտ օրերս։ Դաշինքի մասին պաշտոնական հայտարարությանը, կարծում եմ, վերջնական պետք է սպասել մարտի տասնմեկի կուսակցության համագումարում։ Այդ ժամանակ, հավանաբար, ցուցակն էլ կներկայացնենք։

–Մեծամասնական ընտրակարգով առաջադրումներ լինելո՞ւ են։

Մտածում ենք դրա մասին, բայց մենք մտածել ենք մեր կուսակցությունում և որոշակի ընդհանրացումից հետո մեր տեսակետը կհայտնենք։

–Տարաձայնություններ եղե՞լ են ցուցակի հետ կապված։

–Սկզբունքը հենց այն է եղել, որ մենք ցուցակ չքննարկենք, որ տարաձայնություններ չլինեն։ Օրինակ ես վերջին ընտրություններում ցուցակում վերջին տեղում եմ եղել ու կարող եմ այս անգամ էլ նույն տեղում լինել: Կարծում եմ՝ հավաքված են այնպիսի մարդիկ, որոնք այդ սկզբունքով են մոտենում նմանատիպ հարցերին և դրանք երկրորդական են համարում:

–Ձեր դաշինքը ի՞նչ քանակությամբ տեղեր կունենա խորհրրդարանում։

–Մենք պայքարում ենք հաղթելու համար՝ ի տարբերություն այլոց, որոնք փորձում են մտնել ինչ–որ մի տեղ։ Իմիջիայլոց, միշտ բոլորի մոտ թերահավատություն կա, երբ քաղաքական գործընթացը սկսվում է։ Բայց հիշենք, որ երբ Լևոն Տեր–Պետրոսյանը մտնում էր քաղաքական գործընթաց, նույն թերահավատությունը կար. շատերը քմծիծաղ էին տալիս, ասում էին՝ բայց ինչ հաջողություն, որևէ բան չի լինի։ Տեսե՛ք, որ ինչ–որ հաջողություն եղավ։ Հիմա գրեթե այդ նույն քաղաքական թիմի հիմնարար, սկզբից  այդ գործընթացը տարած մարդկանցից մի զգալի հատված այստեղ է։ Հավատացած եղեք, որ նոր անակնկալներ ձեզ համար կլինեն։

Ներկայացրեց Արեգնազ Մանուկյանը

Այս խորագրի վերջին նյութերը